Prokuroria e Posaçme kundër Krimit të Organizuar dhe Korrupsionit ka marrë në pyetje deputetin e Partisë Socialiste, Vullnet Sinaj, i cili u përfshi në në një përplasje fizike me deputetin e Partisë Demokratike, Bledion Nallbati të hënën në Kuvend.
Sipas News 24, deputeti Sinaj është shprehur se ishte marrë në pyetje nga oficeri i Byrosë Kombëtare të Hetimit. “Sqarova të gjitha rrethanat e ngjarjes”, ka deklaruar Sinaj.
Kujtojmë se për këtë çështje SPAK nisi hetimet për incidentin e ndodhur pas dy kallëzimve të bëra nga PS dhe PD në lidhje me dhunën në parlament. PS fajëson deputetin Bledion Nallbati si fajtor për shkak të goditjes me grusht të Sinaj, ndërkohë që Rithemelimi fajëson Sinaj për provokimin e dhunës.
Në padinë penale të firmosur nga kreu i grupit socialist Bledi Çuçi, kërkohet që ndaj Nallbatit të nisë hetimi për veprën penale “Goditje për shkak të detyrës”. Nga ana tjetër edhe Partia Demokratike ka paditur deputetin socialist Vullnet Sina. Në kallëzimin e firmosur nga Gazment Bardhi në cilësinë e kryetari të grupit parlamentar Sina gjithashtu akuzohet për veprën penale “Goditje për shkak të detyrës”. /Opinion.al
