Ka shkuar në 238 numri i personave që kanë humbur jetën dhe 650 numri i të plagosurve në një aksident, ku u përfshinë tre trena në shtetin lindor të Indisë Odisha, thonë zyrtarët.
Një tren pasagjerësh mendohet se ka dalë nga shinat para se të goditet nga një tjetër në shinat ngjitur vonë të premten. Ndërsa një tren tjetër ishte i palëvizshëm.
Numri i të vdekurve pritet të rritet, pasi shumë persona janë ende të bllokuar në rrënoja.
Shkaku i përplasjes i ngjarjes më të rëndë të transportit hekurudhor në Indi këtë shekull nuk është ende i qartë.
Zyrtarët thanë se disa vagona nga Shalimar-Chennai Coromandel Express dolën nga shinat rreth orës 19:00 (13:30 GMT) në distriktin Balasore, goditën një tren mallrash të palëvizshëm dhe disa nga vagonët e tij përfunduan në shinat ngjitur.
Një tren tjetër – Howrah Superfast Express që udhëtonte nga Yesvantpur në Howrah – më pas goditi vagonët e përmbysur.
“Forca me të cilën u përplasën trenat ka rezultuar në shtypjen e disa vagonëve. Ne po përpiqemi të kalojmë nëpër rrënojat për të arritur tek pasagjerët. Ne gjithashtu duhet të jemi të kujdesshëm që të mos i lëndojmë ata që janë gjallë,” –tha Atul Karwal, shefi i Forcës Kombëtare të Reagimit ndaj Fatkeqësive (NDRF) për agjencinë e lajmeve ANI.
