Grabitja e ndodhur ditën e djeshme në aeroportin e Rinasit ka vënë në lëvizje gjithë strukturat e shtetit.
Autoritetet përveç Admir Murataj, i cili mbeti i vrarë gjatë shkëmbimit të zjarrit me policinë, ende nuk kanë bërë publik identifikimin e autorëve të tjerë që morën pjesë në grabitje.
Ndërkohë, një nga banorët i cili ka parë shkëmbimin e zjarrit mes policisë dhe grabitësve, shprehet për “Top Channel” se makina e autorëve të grabitësve ishte e bllokur.
Por, pavarësisht se policia ishte shumë pranë tyre, banorët rrëfejnë se grabitësit kanë qëlluar disa herë në drejtim të forcave të policisë.
Ka qenë Murataj i cili qëlloi vazhdimisht në drejtim të policisë, gjë e cila u dha kohë shokëve të tij që të largoheshin.
“Këtu ishte furgoni i bardhë me shkrime anësore, policia ishte në kthesë me fugon, dera anësore e të cilit ishte hapur, sepse e kanë me shinë. Ka qenë luftë, gjuanin shumë persona, s’kanë qenë as një dhe as dy. Të shtënat kanë zgjatur 3 minuta, pastaj s’pati më. Në fillim kallash, pastaj filluan me pistoleta. Në momentin që u vra ai personi pushuan edhe të shtënat,-tregon banori.
Ndërkohë, një tjetër banor konfirmon të njëjtën gjë, duke thënë se shkëmbimi i zjarrit zgjati pak minuta, derisa u ekzekutua me plumb në kokë Admir Murataj.
“Ishte një breshëri zjarri, ndërsa më tej u ndal gjithçka. Se çfarë ka bërë më tej policia, s’e di, nuk kam dalë më në derë”-shprehet banori./ Opinion.al E.Xh.
