Policia ka arrestuar autorin e aksidentit me pasojë vdekje të ndodhur dy ditë më parë në aksin rrugor Fushë Mamurras – Adriatik, në vendin e quajtur “Presa e Bamit”.
Drejtuesi i automjetit, pasi përplasi 38-vjeçarin që po lëvizte me biçikletë është larguar nga vendi i ngjarjes pa i dhënë ndihmë të aksidentuarit.
38- vjeçari është gjetur nga kalimtarët dhe më pas është transportuar në spital, por si pasojë e lëndimeve të rënda fizike të marra, ka ndërruar jetë.
“Si rezultat i veprimeve hetimore dhe procedurale intensive të kryera nga shërbimet e policisë rrugore në bashkëpunim me shërbimet e Komisariatit të Policisë Kurbin, është bërë i mundur identifikimi dhe arrestimi i drejtuesit të automjetit që shkaktoi aksidentin, shtetasit S. R., 35 vjeç, banues në Kurbin”,-njofton policia.
Gjithashtu, në cilësinë e provës materiale është gjetur dhe sekuestruar automjeti tip “Benz” që drejtonte shtetasi S. R., në momentin e aksidentit./ Opinion.al
