Policia ka vënë në pranga shoferin që pas mesnate përplasi për vdekje në aksin rrugor Shkodër-Lezhë një 68-vjeçar.
Bëhet fjalë për 31-vjeçarin me inicialet K.K., banues në Shkodër. I riu pasi aksidentoi këmbësorin u largua nga vendi i aksidentit.
“Si rezultat i veprimeve të shpejta hetimore dhe procedurale të kryera me qëllim përcaktimin e autorësisë së një aksidenti në aksin rrugor “Shkodër-Lezhë”, i cili ndodhi rreth mesnatës dhe pati si pasojë humbjen e jetës së shtetasit M. P., 68 vjeç, specialistët për Hetimin e Krimeve të Komisariatit të Policisë Shkodër, në bashkëpunim me specialistët e qarkullimit rrugor, bënë të mundur identifikimin, kapjen dhe arrestimin e drejtuesit të automjetit që përplasi shtetasin M. P. (këmbësor), shtetasit K. K., 31 vjeç, banues në Shkodër. Ky shtetas, pas aksidentit, ishte larguar nga vendngjarja”, njoftoi policia.
Efektivët e uniformave blu kanë sekuestruar makinën tip ‘Peugeot’ me të cilin ndodhi aksidenti.
