Një aksident rrugor ka ndodhur në aksin rrugor “Mbikalimi i Patokut-Laç”, me pasojë vdekjen e një personi.
Sipas uniformave blu mësohet se një automjet ka përplasur një këmbësor 59-vjeçar, e më pas është larguar nga vendngjarja.
Këmbësori është transportuar menjëherë në Spitalin Rajonal Kurbin, por humbi jetën gjatë rrugës.
“Në aksin rrugor “Mbikalimi i Patokut – Laç”, dyshohet se një automjet ende i paidentifikuar ka aksidentuar një këmbësor, shtetasin F. H., 59 vjeç, i cili ishte duke lëvizur në këmbë.
I dëmtuari është transportuar menjëherë në spitalin rajonal Kurbin, por ka ndërruar jetë gjatë rrugës për në spital. Drejtuesi i automjetit është larguar nga vendngjarja së bashku me automjetin”, njofton policia.
Grupi hetimor, nën drejtimin e Prokurorisë, po vijon punën për identifikimin dhe kapjen e drejtuesit të automjetit, si dhe për sqarimin e plotë të rrethanave të ngjarjes./Opinion.al
