Personi që u ndoq sot nga policia dhe shkaktoi aksidentin e trefishtë në Elbasan ku mbetën të plagosur 6 persona është shprehur se nuk u ka ndaluar policëve pasi po ndiqej nga një fuoristradë.
Lexo edhe: Nuk i bindet policisë dhe godet postbllokun, çfarë ndodhi në Elbasan
Aldrion Shehun nuk iu bind tre postblloqeve nga Pogradeci në Elbasan duke detyruar kështu forcat e rendit të ndërhyjë forcërisht për ndalimin e tij.
Kur ishte në hyrje të Elbasanit, policia ka hedhur zinxhirë me gozhdë për çarjen e gomave të makinës ‘Volkswagen Passat’ duke bërë që ai të kalojë në anën tjetër të rrugës, gjë e cila solli edhe përplasjen me mjete të tjera.
Për pasojë janë plagosur pesë persona dhe një efektiv i forcave Shqiponja të Elbasanit, Eugen Abdurrazaku. Ky i fundit është dërguar në spitalin Ushtarak pasi është dëmtuar rëndë në njërën këmbë ndërsa të plagosurit e tjerë janë përcjellë në spitalin e Elbasanit pa dëmtime serioze.
Sipas dëshmisë së 27-vjeçarit një fuoristradë i ishte vënë nga pas që në Devoll duke e detyruar të largohej me shpejtësi dhe rrjedhimisht nuk i ndaloi postblloqeve të policisë.
Ai rezulton me precedentë penal pasi të njëjtin episod e ka kryer edhe gjatë vitit 2018. Në brendësi të makinës së tij janë gjetur një sërë targash false, të cilat ende nuk është mësuar se për çfarë do të përdoreshin. /Opinion.al
