Një 51-vjeçare në Lushnje ka gjetur vdekjen pasi është përplasur nga një makinë e drejtuar nga një 22-vjeçar në gjendje të dehur. Sipas policisë 22-vjeçari me iniciale A.H, i cili po drejtonte në gjendje të dehur automjetin tip “Volkswagen”, ka dalë nga rruga dhe ka përfunduar në lulishten e qytetit.
Si pasojë e këtij aksidenti ka gjetur vdekjen 51-vjeçarja me iniciale T.A, ndërkohë që të plagosur kanë mbetur bashkështorti i saj 54-vjeçari F.A dhe djali i tyre 24-vjeçari Q.A që ndodheshin me të.
Babai dhe djali, të cilët mbetën të plagosur ndodhen në spital nën kujdesin e mjekëve. Pas aksidentit është bërë arrestimi në flagrancë i 22-vjeçarit.
Njoftimi i Policisë:
Specialistët e Sektorit të Qarkullimit Rrugor në Drejtorinë Vendore të Policisë Fier, arrestuan në flagrancë shtetasin:
A.H, 22 vjeç, banues në Lushnje.
Arrestimi i këtij shtetasi u bë pasi në datën 10.08.2019, rreth orës 23:10, në lagjen “Skënder Libohova”, duke drejtuar në gjendje të dehur mjetin tip “Volksëagen” ka dalë nga rruga dhe ka përfunduar në lulishten e qytetit.
Për pasojë ka ndërruar jetë shtetasja T.A, 51 vjeçe, dhe është dëmtuar bashkëshorti i saj, shtetasi F.A, 54 vjeç dhe djali i tyre Q.A, 24 vjeç, të cilët ndodheshin në lulishte.
Shtetasi F.A dhe Q.A ndodhen në Spitalin e Lushnjes nën kujdesin e mjekëve.
Materialet i kaluan Prokurorisë pranë Gjykatës së Shkallës së Parë Lushnje për veprime të mëtejshme proceduriale./Opinion.al
