Pas disa ditësh i shtruar në një spital privat në Tiranës, si pasojë e një sëmundjeje të rëndë me mushkëritë, mësohet se ish-kryeministri Fatos Nano, ka shfaqur shenja përmirësimi të shëndetit.
Sipas burimeve pranë spitalit ku Nano po merr trajtim nga bluzat e bardha, tashmë ai nuk është më i intubuar dhe ndodhet në pavijonin e Reanimacionit. Edhe pse gjendja shëndetësore është më e stabilizuar, procedura e “Trakeostomisë”, sipas bluzave të bardha po jep rezultate optimiste për shëndetin e ish-kryeministrit.
Kjo procedure lejon kalimin e ajrit dhe oksigjenit drejt mushkërisë nëpërmjet aparatit të vendosur. Kjo mundësohet nga një tub që është i lidhur me respiratorin dhe trakenë e pacientit.
Megjithatë, mjekët shprehen të kujdesshëm se rehabilitimi i ish-kryeministrit ka një rrugë të gjatë.
Kujtojmë se, prej disa ditësh Nano u shtrua në spital, pasi prej kohësh vuan nga një sëmundje pulmonare, një sëmundje që vështirëson frymëmarrjen.
Fatos Nano ka qenë 3 herë kryeministër i vendit në periudha të ndryshme dhe u largua nga pushteti dhe drejtimi i Partisë Socialiste në vitin 2005./Opinion.al
