Këshilltarja e presidentit të SHBA Donald Trump për pandeminë e koronavirusit, Deborah Birx është shprehur në një konferencë për shtyp se përmirësimi i situatës në Itali dhe Spanjë i jep shpresë SHBA.
“Situata e fundit në Itali dhe Spanjë, ku rastet e pacientëve të rinj dhe vdekjet janë ulur në ditët e fundit na jep shpresë se çfarë do të ndodhë në të ardhmen në Shtetet e Bashkuara”,-tha Birx.
Ditën e diel, Nju Jorku që konsiderohet një nga “vatrat e kuqe” të pandemisë në SHBA, shënoi një ulje të viktimave dhe rasteve të reja me koronavirus.
“Shpresojmë se pas javës së ardhshme do të shohim një stabilizim të situatës në zonat metropolitan ku shpërtheu Covid-19 në javët e shkuara”, u shpreh doktoresha Birx.
Aktualisht, Shtetet e Bashkuara konfirmojnë 337 mijë persona të infektuar dhe 9619 viktima nga virusi. Në Itali, të dielën u raportuan 525 viktima në 24 orë, niveli më i ulët i humbjeve të jetës që prej 19 marsit. Po ashtu ulje të numrit të viktimave nga koronavirusi u regjistrua dhe në Spanjë./ Opinion.al
