Vlora po përballet me probleme pas reshjeve të shiut që kanë përfshirë vendin tonë. Në disa zona të këtij qarku janë përmbytur, ndërsa në disa rrugë ka vështirësi në qarkullimin e automjeteve.
Lidhur me këtë situatë, ka reaguar Prefekti i qarkut Vlorë Flamur Mamaj, i cili është shprehur për mediat se sot do të mbahet edhe mbledhja e shtabit të emergjencave.
Ai theksoi se aktualisht situata është nën kontroll, ndërsa shtoi se ndonëse ka ngritje të kuotave në Vjosë, Selenica nuk është përmbytur.
“Sot situata në Vlorë është e stabilizuar. Situata në Përmet dhe Memaliaj është e qetë. Situata edhe këtu në urën e Mifolit do të stabilizohet të paktën për 12 orët e ardhshme. Do ta mbajmë situatën në vëzhgim dhe kushtet e motit do të përmirësohen. Ndërprerjet e shiut të herë pas hershme na favorizon që të mos kemi situatë të rënduar. Por parashikime të sakta nuk mund të bëjmë. Ajo që ka parashikuar IGJEUM është për tu marrë në konsideratë dhe ne po punojmë. Sot kemi mbledhjen e shtabit të emergjencave ku do të përcaktojmë të gjitha detyrat, për të gjitha institucionet, me qëllim që të jemi të përgatitur. Do të përdoren të gjitha protokollet në kohë. Edhe niveli sot këtu në Vjosë është falë ndërhyrjeve të bërë nga qeveria. Nuk kemi përmbytje në Selenicë. Po të ishim në kuotën 6.6 siç jemi sot, para dy vitesh duhet të kishim përmbytje në Selenicë. Jemi në parametra shumë normalë, por kemi ngritje të kuotave në urën e Mifolit”, tha Mamaj./ Opinion.al
