Kryetari i Bashkisë Shkodër, Bardh Spahia me anë të një postimi në rrjetet sociale ka reaguar në lidhje me situatën e krijuar nga moti i keq.
Spahia thotë se përmbytjet në nënShkodër nuk vijnë për shkak të reshjeve të shiut, por nga shkarkimet e ujërave të hidrocentraleve.
Kryebashkiaku i Shkodrës, thotë se qytetarët në zonat e përmbytura po përballen dhe me ndërprerje të energjisë elektrike dhe se deri më tani qeveria nuk i ka ndihmuar.
Më tej, ai thekson se edhe KESH duhet të marrë përsipër kompensimin për dëmet ndaj banorëve.
Postimi i plotë:
Përmbytje që nuk vijnë nga reshjet e shiut por vërshimi i ujrave të hidrocentraleve që nuk ndalen së shkarkuari sa herë mbushin rezervat e nevojshme për shitje.
Në nënShkodër situatat po përsëriten, duke u bërë tejet të rënda për familjet e këtyre njësive administrative, ekonomia e të cilave është shkatërruar thuajse plotësisht. Brenda pak orësh familjet e Anës së Malit shohin se si harta e përmbytjes zgjerohet dhe bujqësia, blegtoria, shtëpitë e gjithçka tjetër rrethohet nga uji, duke dëmtuar cdo gjë.
Mungesa e energjisë për fshatrat është kthyer në problem serioz. E kam theksuar edhe më herët dhe fatkeqësisht po më duhet ta përsëris këtë gjë, pasi zëri ynë dhe i banorëve po bie në vesh të shurdhët. Duhen menduar zgjidhje njëherë e mirë për këto banorë, me masa afatgjatë.
Mjaft është mjaft, banorët nuk duhet të lihen të vetëm. Është një barrë ekonomike e pa përballueshme për xhepat e këtyre familjeve, e gjitha kjo që po ndodh nga përmbytjet e vazhdueshme. Askush nuk merr përsipër kompensimin e dëmeve. KESH përveç se të përfitojë nga shitja e energjisë, duhet të marrë përsipër kompensimin për dëmin ndaj banorëve. Ngre dyshimet e mija të forta për menaxhimin e kaskadës së Drinit.
Shteti shqiptar ka detyrimin t’u përgjigjet këtyre banorëve, pasi faturat financiare po zënë njëra – tjetrën,-shkruan Spahia./Opinion.al
