Kryebashkiakja e Shkodrës, Voltana Ademi, në një deklaratë për media, këtë të premte ka thënë se situata e shkaktuar nga përmbytje në këtë qark vazhdon të jetë e rëndë.
Sipas Ademit, sipërfaqe të mëdha tokash bujqësore vazhdojnë të jenë nën ujë, ndërkohë që emergjente është sigurimi i ushqimit për bagëtitë.
Gjithashtu, Ademi thekson se është detyrim i qeverisë shqiptare të marrë masat e menjëhershme për vlerësimin e dëmeve dhe dëmshpërblimin e asaj që është produkti bujqësor tashmë i shkatërruar në këto njësi administrative.
“Situata e përmbytjeve në Bashkinë Shkodër, në territoret e njësive administrative Ana e Malit, Dajc, Berdice, Velipoje vazhdon të jetë e rëndë. Me qindra, mijëra hektarë toke janë akoma nën ujë, duke rënduar kësisoj edhe situatën pos- përmbytje në ato territore ku uji ka filluar të largohet.
Me sipërfaqe të tëra toke të mbjellë, tashmë janë dëmtuar dhe kërkojnë ndërhyrjen e menjëhershme të shtetit. Bashkia Shkodër ka ngritur prej disa ditësh grupet e evidentimit të cilët po punojnë në terren për evidentimin e dëmeve. Kemi kërkuar pranë Komisionit te Emergjencave Civile në Prefekture, pranë Ministrisë se Bujqësisë, direkt në komunikim edhe me ministren, vlerësimin e të gjitha dëmeve të shkaktuara nga përmbytjet për shkak të shkarkimeve në kaskadën e Drinit gjatë javës së fundit.
Në këto momente që po flasim, emergjenca vazhdon të jetë për gjënë e gjallë. Kërkesa jonë vazhdon të jetë permanente për sigurimin e mbi 150 ton koncentrat të domosdoshme për gjënë e gjallë, për këto fshatra, për një periudhe 10 ditore.
Ndërkohë me vlerësimin e dëmeve do të verifikojmë vazhdimësinë e nevojës për sigurimin e ushqimit për gjënë e gjallë, për periudhën e dimrit dhe pranverës, pasi behet fjale për toka bujqësore tashme te dëmtuara rende, të mbjella me foragjere, jonxhe, njëkohësisht me grurë por edhe me perime sidomos në zonën e Nënshkodrës.
Duhet të kemi ne konsiderate që gjatë periudhës se pandemisë, për shkak te një pune të lavdërueshme që të gjithë njerëzit kanë bërë në tokat bujqësore, kemi edhe territore me të mëdha të mbjella. Rrjedhimisht, kemi edhe dëmtime më të mëdha. Nevoja për të ndërhyrë është e domosdoshme, dëmshpërblimi është mëse i domosdoshëm.
Është detyrim i qeverisë shqiptare të marrë masat e menjëhershme për vlerësimin e dëmeve dhe dëmshpërblimin e asaj që është produkti bujqësor tashmë i shkatërruar në këto njësi administrative.
Në vitin 2018, kemi patur një situate të ngjashme me ketë që kemi kaluar këto dite. Në vitin 2018 ne nuk kemi patur asnjë para të dhënë si dëmshpërblim për banorët. Në vitin 2018, ne bëmë të gjitha evidentimet por asnjë lek nuk u pagua pavarësisht se kjo u premtua.
Ne kemi pastruar teëgjitha kanalet e dyta dhe të treta kulluese, në të gjithë këto territore. Behet fjalë për 85% të sistemit të kullimit të pastruar nga Bashkia Shkodër. Me kalimin e lumenjve te kanalet kulluese dhe në tokat bujqësore gjithçka dëmtohet. Prandaj dëmshpërblimi për fermerët është mëse i nevojshëm. Nga ana tjetër Bashkia Shkodër kërkon të gjithë dëmshpërblimin për punën e realizuar për pastrimin e kanaleve të dyta dhe të treta.
Investimet e domosdoshme të munguara duhet të alokohen në buxhetin e qeverise për hapjen e kanaleve të para kulluese gjë që nuk është bërë në këtë territor, është kompetence e Bordit të Kullimit dhe e Ministrisë se Bujqësisë. Prandaj ndërhyrja e koordinuar, sikurse e bën Bashkia Shkodër për ta mbështetur procesin e kullimit duhet të jetë vazhdimësi e investimeve qofte në kullim por edhe në të gjithë veprat mbrojtëse, të cilat që në vitin 2013 nuk janë realizuar, pavarësisht kërkesave të vazhdueshme jo vetëm të bashkisë por sidomos të banoreve të këtyre zonave të përmbytura”, tha Ademi./Opinion.al
