Ka shkuar në 5 numri i viktimave nga moti i keq dhe përmbytjet e orëve të fundit në Itali.
Mediat italiane shkruajnë se zonat më të prekura janë Emilia Romagna, pasi rajoni është gjunjëzuar për shkak të tejmbushjes së lumenjve dhe përrenjve.
Sipas autoriteteve italiane edhe ekipet e shpëtimin e kanë të vështirë punën. Deri më tani thuhet se për shkak të motit të keq dhe përmbytjeve janë evakuuar rreth 5 mijë banorë dhe janë mbyllur disa shkolla në Romagna.
Situata në Emilia Romagna është gjithnjë e më dramatike për shkak të emergjencës së motit të keq që ka prekur edhe rajonet fqinje. Gjatë natës pati përmbytje të reja, uji ka pushtuar rrugët dhe shtëpitë në shumë qytete: nga Cesena në Faenza, nga Riccione në Lugo. Operacionet e shpëtimit janë të vështira, banorët janë njoftuar të ngjiten në katet e sipërme të shtëpive.
Numri i viktimave dhe i të zhdukurve është dramatik: për momentin ka shkuar në pesë.
Mijëra njerëz u evakuuan pas strukturave të përmbytura dhe lumenjve të vërshuar që kanë dalë nga shtrati. Në Cesena, njerëzit u detyruan të ngjiteshin në çati, duke pritur që të transportoheshin me helikopterë.
Në Forlì kryebashkiaku shpalli “situatën më të keqe të përjetuar ndonjëherë”. Shkollat u mbyllën gjithashtu të mërkurën më 17 maj, në Bolonja dhe në komunat e tjera të prekura. Situata në Faenza, në zonën e Ravenës, është dramatike, ku uji ka hyrë në qytet dhe shumë njerëz janë evakuuar.
Gjithashtu në zonën e Ravenës, lumi Santerno u përmbyt gjatë natës dhe pati të evakuuar të rinj të mirëpritur në qendrat e ngritura. Riccione është praktikisht nën ujë.
Ndërkohë fotot dhe mesazhet në rrjetet sociale të njerëzve në Faenza, Ravenna dhe Cesena kërkojnë ndihmë për shkak se shtëpitë e tyre janë përmbytur. Për shkak të anulimeve dhe vonesave, qarkullimi i trenave është ndërprerë në shumë seksione. Ndërkohë vazhdon të bjerë shi, është llogaritur se kanë rënë 130 mm shi në vetëm 24 orë.
Parashikimet nuk premtojnë asgjë të mirë: një alarm i ri i kuq i motit për lumenj, rrëshqitje dheu dhe stuhi u lëshua sërish sot për një pjesë të madhe të rajonit Emilia-Romagna./Opinion.al
