Moti i keq po mundon disa rajone të Italisë, por më e goditura prej tyre është Emiglia Romagna, ku autoritetet kanë dhënë alarmin e kuq.
Sipas mediave italiane, prej 48 orësh ka rënë më shumë shi sesa në katër muaj të marrë së bashku nga janari në prill. Nga përmbytjet dhe daljen e lumenjëve nga shtrati, janë mbyllur pothuajse të gjithë shkollat në zonat ku situata paraqitet tepër e rëndë.
Një 80-vjecar humbi jetën në orët e para të ditës, i rrëmbyer nga uji në Castel Bolognese. Po ketu u regjistrua shembja e një shtëpie për shkak të rrëshqitjes së tokës.
Disa familje tashmë janë evakuuar që nga mbrëmja e djeshme dhe kryebashkiakët këshillojnë të mos qarkullojnë me makinë pasi situata edhe këtë mëngjes paraqitej e rënduar.
Probleme ka pasur dhe me qarkullimin në disa linja hekurudhore, përfshirë atë Bolonja-Rimini. Më shumë se 250 persona janë evakuar në Ravennate, 100 të tjerë në territorin e Faenzas për shkak të vërshimit të ujrave e dhjetëra në Biancanigo di Castel Bolognese.
Situatat më kritike janë regjistruar në zonën e Ravenës në fshatrat San Pancrazio dhe Ragone, San Marco, Santerno, Ammonite, Mezzano, Glorie dhe Torri. Rruga shtetërore Futa në Apenine është mbyllur për shkak të rrëshqitjes së dheut, ndërsa disa ura janë mbyllur edhe në zonën e Modenës.
Teknikët e RFI, me bashkëpunimin e Prefekturës dhe Mbrojtjes Civile, po monitorojnë nivelin e lumenjve si Montone, Lamone, Senio dhe Santerno.
Prefekturat së bashku me qendrat operative komunale po monitoron situatën. Në terren, përpos ekipeve të zjarrfikësve dhe vullnetarëve te mbrojtjes civile, është dërguar dhe ushtria./Opinion.al
