Bashkia e Tiranës do të ndihmojë me 100 mijë euro rajonin e Emilia Romagnas në Itali, i cili gjatë muajit maj është përballur me përmbytje masive.
Akordimi i ndihmës financiare është bërë me kërkesë të kryetarit të Bashkisë së Tiranës, Erion Veliaj.
Reshjet masive të muajit maj në rajonin e Emilia Romagna, Itali, kanë shkaktuar fatkeqësi natyrore me pasoja të rënda.
Situata e krijuar për shkak të reshjeve të dendura të shiut ka nxjerrë nga shtrati lumenjtë që kalojnë në këtë rajon, duke shkaktuar dëme të konsiderueshme në pronat e qytetarëve, shtëpi private, kryesisht në komunat Forli, Cesena e Ravena.
Për shkak të përmbytjeve kanë humbur jetën 15 persona, si dhe janë regjistruar dëme të shumta në banesa, ura, rrugë dhe në disa biznese, të cilat janë përmbytur nga uji dhe balta.
Popullsia e dëmtuar është mbi 23 mijë banorë, një pjesë prej të cilëve janë evakuuar nga autoritetet dhe të tjerët janë transferuar tek të afërmit e tyre.
