Përmbytjet në Stamboll dhe shumë zona të tjera të Turqisë kanë shkaktuar dëme kolosale materiale, ndërsa si pasojë e vërshimit të ujërave janë regjistruar edhe viktima.
Për të pakësuar dëmet banorët e zonave të prekura janë përpjekur që të gjejnë mënyra që automjetet e tyre të mos i marrë rrjedha e ujit.
E tillë është situata në një restorant të Stambollit, ku pronarët e dy automjeteve luksoze, i kanë lidhur ato në një pemë, për të mos u përmbytur.
“Ne përjetuam një gjë të tmerrshme, djali dhe nipi im lidhën automjetet që të mos i merrte rryma. Kjo është një fatkeqësi natyrore. Gjithmonë pritet. Të njëjtën gjë e kemi përjetuar edhe në vitin 2019. Falë Zotit, klientët tanë i çuam në çati me një shkallë. Nuk kemi pasur viktima. Këto pemë penguan që ato automjete t’i merrte rrjedha e ujit në liqen. Pastaj kemi thyer xhamat e përparmë. Kur u kullua uji, automjetet mbetën në vendin e tyre”, -tha Pronari i njërës prej makinave Halit Yetkin.
Sipas të dhënave nga Ministria e Brendshme turke, 2 viktima janë regjistruar deri tani, ndërsa 4 të tjerë janë raportuar të zhdukur.
Situatë e vështirë edhe në Stamboll, ku nga përmbytjet janë dëmtuar shumë automjete, biznese dhe banesa.
