Kryetari i Partisë Demokratike, Lulzim Basha, ka reaguar pas deklaratave të Kryeministrit Edi Rama, i cili në konferencën për shtyp sot foli për menaxhimin e situatës së përmbytjeve në vend.
Basha akuzoi kryeministrin Edi Rama se po bën propagandë me këtë fatkeqësi dhe nuk po merr përgjegjësinë për këtë situatë.
Më tej, kryedemokrati theksoi se Rama gënjen pasi përmbytja ka ardhur nga kaskada.
“Gjatë ditëve të kaluara kam qenë në zonat e përmbytura. I kemi parë me sytë tanë dëmet që janë shkaktuar. Edhe sot që flasim mijëra familje janë nën ujë, vuajnë për aksesin për të dalë nga shtëpitë. Janë pa medikamente. Jemi përpjekur të bëjmë gjithçka dhe do të vazhdojmë për t’u qëndruar pranë këtyre njerëzve. Kjo është e vetmja qeveri në botë që fatkeqësinë e shikon si mundësi për propagandë. Dhe njeriu që ka 8 vjet Kryeministër na tregon historikun e reshjeve në 20 vitet e fundit. Në fakt gënjen. Përmbytja ka ardhur nga kaskada. Ky vazhdon t’ju vëjë fajin të tjerëve. Kush ka qenë 8 vite Kryeministër? Tani në vend që të mendojë për hallin e këtyre njerëzve, del pa pikë turpi dhe flet sikur ka ardhur dje në qeveri. Kujt t’i kërkojnë llogari njerëzit? Çfarë po bën për t’i ardhur në ndihmë? 8 vite vetëm propagandë. Edhe fatkeqësinë më të madhe e merr dhe e shndërron në propagandë. Ky njeri është problemi i vendit, ky dështak prodhon vetëm dështime. Të bëhemi të gjithë bashkë dhe ta largojmë”, është shprehur Lulzim Basha./Opinion.al
