“Trafikant i pakapshëm, përmbyti Europën me drogë”. Kështu shkruan një nga mediat më prestigjoze ndërkombëtare “Wall Street Journal”, në një artikull dedikuar, Dritan Rexhepit, i burgosur në Ekuador.
Policia e Firences raportoI se ka ndjekur një rrjet ndërkombëtar të shpërndarjes së kokainës. Operacioni shumëvjeçar ekspozoi se si grupet e reja kriminale po përfitojnë nga globalizimi për ta kthyer Europën në një rival të SHBA për tregun e kokainës, sipas DEA-s amerikane.
Në artikull shkruhet se Dritan Rexhepi e merrte kokainën në Kolumbi nga një shok i burgut. Duke përdorur një celular të fshehur, ai organizoi dërgesa me vlerë qindra miliona dollarë në anije me kontenierë në portet në Holandë, transferoi të ardhurat dhe urdhëroi sulme ndaj kundërshtarëve, duke përfshirë dy vrasje.
Kufijtë e hapur, komunikimet moderne e të sigurta kanë ndihmuar grupe si i Rexhepit në trafikimi e kokainës, vijon “Wall Street Journal”.m Pjesa më e madhe e dërgesave hyjnë në Europë përmes porteve komerciale të fshehura në kontejnerë që janë shumë të shumtë për t’u kontrolluar. Vendet e Bashkimit Europian kanë hequr kufijtë e brendshëm, por forcat e policisë mbeten kombëtare. Europol, agjencia policore e BE-së, është bërë një qendër thelbësore për bashkëpunim. Por një problem që evidentohet janë pengesat gjuhësore e burokratike dhe nevoja për burime, pavarësisht se bashkëpunimi mes vendeve të Europës nuk mungon.
Sipas zyrtarëve, rrjeti i Rexhepit, i njohur si kompania “Bello”, ishte një ndër grupet kriminale më të mëdha që lidhej me Shqipërinë, një vend i vogël në Ballkan që ka një diasporë të madhe në Europë e në botë.
“Grupet shqiptare janë vërtet të forta,” thotë Francesco Messina, drejtor antikriminal i policisë së Shtetit të Italisë. “Ata kanë pushtuar tregun e kokainës aq shumë sa që tani janë ndër grupet më të forta kundër të cilave duhet të luftojmë.”
Operacioni që vuri Rexhepin në pranga nisi në vitin 2014 në Firence me një kontroll policor dhe u zgjerua në një hark kohor prej 6 vjitesh. Ky operacion përfundoi në Shtator të vitit të shkuar. Si rezultat u bënë më shumë se 100 arrestime në 10 vende për trafik ndërkombëtar droge dhe sulme.
Italia ka kërkuar ekstradimin e Dritan Rexhepit nga Ekuadori me akuzën e krijimit dhe drejtimit të një kanali ndërkombëtar që trafikonte drogë dhe pastronte para.
