Shtatë emigrantë nga Afganistani, Pakistani dhe Bangladeshi kanë gjetur vdekjen, pasi varka me të cilën udhëtonin u përmbyt në një liqen në Turqi.
Varka transportonte më shumë se 70 persona dhe u përmbyt në Liqenin Van kur iu afrua qytetit të Adilceva, ndërsa ende nuk është e qartë përse emigrantët po udhëtonin me një varkë, dhe jo përmes transportit rrugor.
Autoritetet bënë me dije se pesë persona u gjetën të vdekur në vendin e ngjarjes dhe dy të tjerë vdiqën në spital, ndërsa 64 emigrantë të tjerë u shpëtuan dhe u dërguan në spitalet dhe strehat e afërta.
Liqeni Van është afër Iranit, por shtrihet tërësisht brenda kufijve të Turqisë, aty ku qëndrojnë rreth 3.6 milionë refugjatë sirianë, megjithëse teknikisht ata janë vetëm nën “mbrojtje të përkohshme”, pasi qeveria nuk u ofron statusin e refugjatit zyrtar./Opinion.al
