Ditën e sotme është përmbyllur faza e parë e Programit Kombëtar të Zhvillimit Profesional të Mësuesve, ku janë trajnuar më shumë se 10 mijë mësues.
Lajmin e ka bërë të ditur vetë Ministrja e Arsimit dhe Sportit, Ogerta Manastirliu përmes një postimi në rrjete sociale.
Manastirliu thekson se program synon rritjen e kapaciteteve të mësuesve në fushat prioritare të arsimit: Gjuhë Shqipe, Matematikë, Shkenca dhe Teknologji (STEM), si dhe në aftësi ndërdisiplinore.
“Përmbyllëm me sukses fazën e parë për këtë vit të Programit Kombëtar të Zhvillimit Profesional të Mësuesve, ku mbi 10,000 mësues janë trajnuar në të gjithë vendin, për të rritur aftësitë në fusha kyçe si gjuha shqipe, matematika, shkencat natyrore dhe teknologjia.
Po punojmë për fazën e ardhshme të programit, që do të sjellë module të reja në përputhje me kurrikulën e re, me synimin për të vijuar fuqizimin profesional të mësuesve në të gjithë vendin”, tha Manastirliu.
