-U tha në Opinion

Përmbledhje/ Lleshaj: Çfarë do ndodh në 30 qershor


               Publikuar në : 23:34 - 24/06/19 |
geliano fataj

Ministri i brendshëm, Sandër Lleshaj siguron se data e zgjedhjeve lokale, 30 qershori, do të jetë një ditë normale ku sipas tij do të ketë një manifestim dinjitoz të shqiptarëve.  Dhe këtë deklaratë ai e mbështet bazuar në informacione. Sipas tij probleme sporadike në zgjedhje në Shqipëri ka patur përherë por edhe në këtë situatë zgjehdjet do zhvillohen, pasi infrastruktura është gati.

  • Lleshaj: Nëse i gjithë populli ngrihet kundër zgjedhjeve, policia s’do bëjë asgjë

Sandër Lleshaj: Policia nuk është këtu për të përballuar pasivisht të gjithë popullin shqiptar. Në qoftë se ne kemi këtë ide që i gjithë populli shqiptar do të ngrihet kundër zgjedhjeve, policia do të bëjë asgjë, fare, s’do të merret. Sepse policia nuk është këtu për të frenuar popullin shqiptar që të bëjë atë që do populli shqiptar.

Blendi Fevziu: Nëse janë 10-15 përkrahës së opozitës në çdo qendër votimi, prapë është e pamundur.

Sandër Lleshaj: Policia ekziston për t’u marrë me kriminelët dhe policia shqiptare është plotësisht në gjendje të merret me kriminelët, sepse kriminelët janë pak, nuk janë shumë, nuk janë shumicë. Kriminelët janë pak në Shqipëri.

Blendi Fevziu: Po nëse dalin qytetarë në çdo qendër votimi?

Sandër Lleshaj: Në qoftë se, edhe një herë, policia nuk është për t’u marrë me të gjithë popullin shqiptar. Nuk është ky opsioni.

Blendi Fevziu: Pra nëse opozita do të arrijë të mundë të nxjerrë qytetarët, do të jetë e pamundur zhvillimi i zgjedhjeve?

Sandër Lleshaj: Në qoftë se opozita ka popullin me vete? Po opozita mund t’i fitojë zgjedhjet fare kollaj pastaj.

  • Probleme më 30 Qershor? Çfarë informacioni ka policia

Blendi Fevziu: Zoti Lleshaj ju pra jeni të vendosur për të shkuar në zgjedhje më 30 Qershor?

Sandër Lleshaj: Ne nuk jemi të vendosur, ne jemi të detyruar për të shkuar në zgjedhje, ne jemi të detyruar prej Kushtetutës. Kush mund të ishte alternative…

Blendi Fevziu: Po kush ju detyron ju zoti Lleshaj të shkoni në një përplasje, që rrezikon të jetë edhe një përplasje civile?

Sandër Lleshaj: Jo nuk rrezikon të ketë përplasje civile, sepse nuk ka një konflikt civil në Shqipëri.

Blendi Fevziu: A keni ju informacione të klasifikuara si ministri, si polici, nga shërbimet e specializuara që mund të ketë probleme më 30 Qershor?

Sandër Lleshaj:Probleme mund të ketë më datë 30 Qershor. Probleme të nivelit të rendit publik, probleme të kriminalitetit, por jo probleme të konfliktit civil.

Blendi Fevziu: Keni informacione apo hamendje?

Sandër Lleshaj: Kemi dhe informacione që mund të ketë tentativa për të shkaktuar probleme në nivelin kriminal të çështjes, por jo në nivelin civil.

Blendi Fevziu: Çdo me thënë në nivelin kriminal të çështjes?

Sandër Lleshaj:Po grupe të caktuara kriminale, çdo ditë kemi probleme kriminale në Shqipëri. Grupe kriminale ose individë që zhvillojnë veprimtari kriminale ka shumë. Ata që dalin përballë ligjit janë kriminelë.

  • Gazi lotsjellës, Lleshaj: Është standard i gjithë policisë

Është standard i gjithë policisë së botës”. Kështu përgjijet ministri i Brendshëm, Sandër Lleshaj në lidhje me përdorimin e gazit lotsjellës në protesta, apo dhe në situata të tjera përplasjesh.

Polici është i paprekur, e kemi mësuar dorën keq. Nuk preket polici. Gazi është mjeti i shpikur për këtë punë, gazi nuk vret. Të detyron të largohesh nga ajo skenë ku ti nuk duhet të jesh. Nuk është armë. Lëndë helmuese luftarake Shqipëria nuk ka”, tha ministri në emisionin Opinion.

  • Sandër Lleshaj: Mesazhin që i dërgova Bashës

Blendi Fevziu: A e keni thirrur ju shoqëruesin e zotit Basha?

Sandër Lleshaj: Ju thashë që Garda e Republikës ka detyrë ligjore. Ligji i Gardës parashikon që Garda ruan fizikisht kryetarin e partisë më të madhe opozitare parlamentare. Dhe ne ende e quajmë zotin Basha kryetarin e partisë opozitare më të madhe parlamentare. Në këtë situatë disi skicofrenike në vend, ku sfidat ndaj rendit publik janë shtuar dukshëm, ku kemi pasur protesta të dhunshme, ku kemi pasur dhunë në protesta, ku në protesta janë plagosur protestues vetë, nga vetë protestuesit…

Blendi Fevziu: Patjetër në çdo protestë ka pasur zgjedhje të tilla..

Sandër Lleshaj: Pra kemi pasur incidente që protestues janë goditur nga protestues të tjerë. Duke qenë se zoti Basha është drejtues i këtyre protestave, është pjesë e tyre fizike, autoritetet e Gardës e kanë çmuar të nevojshme nevojën për të menduar nëse i duhet rritur apo jo niveli i sigurisë.

Blendi Fevziu: Po këtë e gjykon Garda e Republikës?

Sandër Lleshaj: Patjetër.

Blendi Fevziu: Po ju si Ministër i Brendshëm përse e keni thërritur shoqëruesin e Bashës?

Sandër Lleshaj: Po Garda është në varësinë time dhe përgjegjësinë politike për veprimet apo mosveprimet e Gardës i mbaj unë. Dhe unë përpara se Garda të merrte veprime konkrete për shtimin e rojeve të sigurisë, në mënyrë që kjo të mos keqkuptohej, i kam çuar në mënyrë diskrete një pyetje zotit Basha, përmes bodigardit.

Blendi Fevziu: Nuk gjenit dot një mënyrë tjetër zoti Ministër?

Sandër Lleshaj:Kjo është rruga më konfidente e mundshme. Kjo është rrugë krejtësisht normale, për ta pyetur nëse e konsideron normale apo jo? Ai e konsideroi jo normale, kaq.

Blendi Fevziu: I folët ju për një rrezik?

Sandër Lleshaj: Nuk ka patur rrezik. Nuk kemi patur asnjë informacion për rrezik të shtuar.

Blendi Fevziu: Përse mos ta bënte këtë komandanti i Gardës, por duhet ta bëni ju?

Sandër Lleshaj: Komandanti i Gardës nuk komunikon me drejtuesit e një partie politike. I kam përcjellë një mesazh zotit Basha në mënyrë diskrete, që në kushtet e situatës që kemi, mendohet të rrisim nivelin e sigurisë për të gjithë personalitetet që Garda ka në mbrojtje. Edhe kryeministrit i është rritur niveli i sigurisë, edhe për të tjerë, edhe për mua është rritur.

Blendi Fevziu: Po përse duhet ta pyesnit dhe të mos e bënit?

Sandër Lleshaj: Po që të mos keqkuptohej politikisht, sepse gjithçka keqkuptohet nga opozita jonë sot, gjithçka. Çdo vullnet edhe më normali, keqkuptohet, siç u keqkuptua kjo./ Opinion.al

Pas