Pas arrestimit të qindra aktivistëve, mbështetësit e opozitës në Rusi kanë paralajmëruar se do të mbajnë sot një protestë të madhe në Moskë.
Mijëra persona kanë dalë në manifestime javët e fundit për të kërkuar zgjedhje të lira e të ndershme pasi shumë figura të opozitës, përfshirë eksponentin kryesor Aleksei Navalny dhe aleatë të tij, u përjashtuan nga zgjedhjet lokale në Moskë që do të mbahen muajin shtator.
Në protestën e fundit, forcat e policisë arrestuan mbi 2000 persona dhe shumë të tjerë u dhunuan me motivin se nuk kanë marrë leje nga autoritetet përkatëse për tubimin. Pjesa më e madhe e kandidatëve që ju ndalua të merrnin pjesë në zgjedhje janë prapa hekurave për shkelje të ligjeve për protestat. Shumë nga të arrestuarit, mes tyre dhe studentë, përballen me akuza të rënda të cilat mund t’i mbajnë ata në qeli për një kohë shumë të gjatë.
Protesta e sotme është lejuar nga autoritetet që do të thotë se nuk pritet të ketë arrestime nga pjesëmarrja e tyre. Lideri i opozitës Navalny iu kërkoi mbështetësve të tij që të marshojnë paqësisht nëpër rrugët e qytetit. /Opinion.al
