Policia Rrugore ka paralajmëruar të gjithë shoferët që të kenë kujdes në timon, pas përkeqësimit të kushteve të motit.
Përmes një njoftimi zyrtar, uniformat blu bëjnë me dije se shoferët duhet të tregojnë kujdes në timon dhe duhet të përdorin shenjat dalluese.
“APEL PËR MË SHUMË KUJDES!
Nisur nga përkeqësimi i kushteve atmosferike, si dhe rritja e ndjeshme e trafikut rrugor në të gjitha akset rrugore kombëtare, Policia Rrugore apelon për më shumë kujdes gjatë drejtimit të automjeteve, motomjeteve dhe biçikletave, veçanërisht duke përdorur shenjat dalluese gjatë natës dhe në mot me shi, por edhe gjatë lëvizjes si këmbësorë duke kaluar nga njëri kah i rrugës në tjetrin, pasi rreziku për t’u përfshirë në aksidente rrugore është i madh.
Shërbimet e Policisë Rrugore në të gjithë vendin janë prezente me burime njerëzore dhe pajisje teknologjike të shtuara, jo vetëm për të rregulluar trafikun, por edhe për të parandaluar, konstatuar dhe ndëshkuar shkelësit e rregullave të qarkullimit rrugor, të cilët janë burim rreziku për përfshirje në ngjarje rrugore”, njofton policia.
