Pas përhapjes së variantit të ri të COVID-19, SHBA iu bashkua listës së vendeve te BE-së që po pezullojnë fluturimet nga Afrika e Jugut dhe disa vende të tjera fqinjë të saj.
Varianti i ri, të cilin Organizata Botërore e Shëndetësisë e quajti Omicron, ka përhapje më të shpejt, ndërsa së fundmi në Europë, janë identifikuar dy raste në Britaninë e Madhe.
Shtëpia e Bardhë tha se shkencëtarët dhe zyrtarët e shëndetit publik po punojnë me shpejtësi për të mësuar më shumë rreth variantit të ri. Në deklaratën e tij, Presidenti Biden nxiti amerikanët të vaksinohen dhe ata që janë vaksinuar të bëjnë edhe dozën përforcuese.
“Lajmet për këtë variant të ri duhet ta bëjnë më të qartë se kurrë pse kjo pandemi nuk do të marrë fund derisa të kemi vaksinime globale”,-tha Biden.
Organizata Botërore e Shëndetësisë e klasifikoi të premten variantin e zbuluar në Afrikën e Jugut si një “variant shqetësues” duke thënë se mund të përhapet më shpejt se format e tjera.
