Ministrja e Drejtësisë, Etilda Gjonaj, i është kthyer edhe njëherë debatit me Zërin e Amerikës në lidhje me publikimin e përgjimeve ku deputetë të Partisë Socialiste janë kapur duke i kërkuar ish-drejt të Burgjeve Arben Çuko, favore për militantët e tyre partiakë.
Gjatë një deklarate për mediat, Gjonaj u shpreh se VOA nuk mori në konsideratë qëndrimin e Ministrisë së Drejtësisë dhe argumentet, ndërsa sipas saj procesi i emërimeve është i hapur dhe transparent.
“Dje në mbrëmje VOA nuk mori në konsideratë qëndrimin e Ministrisë së Drejtësisë dhe argumentet, por rikonfimoi qasjen e gabuar lidhur me të dhënat hetimore. U shpreh per prova, por janë indicie që do i japin mundësi Prokurorisë të hetojë. Hetimet nuk kanë të bëjnë me emërimet e reja në burgje. VOA të verifikojë dosjen e emërimeve në burgje. Emërimet dhe dokumentet e punonjësve në Burgje janë në dispozicion të të gjithëve. Jemi të hapur për këdo që dëshiron të shikojë dosjen e rekrutimeve të punonjësve të rinj. Jemi të vetëdijshëm se ka ende për të përmirësuar, por ne po punojmë për ndryshimin e situatës. Lufta me të shkuarën është reale dhe betejë me veten për të ndarë shtetin nga politika”- tha Gjonaj.
