Kryeministri i vendit, Edi Rama, në konferencën e zhvilluar sot ka folur për herë të parë për përgjimet e publikuara ditët e fundit në mediat shqiptare dhe ato të Italisë, ku pretendohet një lidhje mes anëtarëve të klanit mafioz Ndrangheta me zyrtarë shqiptarë. Teksa lexoi përfundimet e Prokurorisë italiane, Rama tha se për këtë çështje duhet të flasë drejtësia.
“Për këtë duhet të flasë drejtësia. Në këtë rast ka folur qartësisht duke dhënë konkluzion grupi hetimor italian. Po e lexoj tani konkluzionin për t’iu thënë pse është turp për të gjithë ju që duhet të informoni publikun por ushqeni tymnajën me llafe. Sipas prokurorisë italiane pas më shumë se një viti udhëtimesh në Tiranë, dhe bisedimesh me njëri-tjetrin për investime që do të bëhen në Shqipëri ato dështuan totalisht dhe i vetmi investim i bërë është një dyqan i vogël për shitjen e rrobave të punës për të cilin ka pasur konflikte mes ortakëve. Në vitin 2018 investimi në Shqipëri sipas bilanceve në QKB është se janë shitur mallra për 5 milion lekë të reja dhe ka humbur rreth 400 mijë lekë të reja, ndërsa në vitin 2019 siguroi 4 milion lekë të ardhura dhe 1.8 milion lekë humbje, ky është konkluzioni i Prokurorisë Italiane”, tha Rama./Opinion.al
