Ministri i Bujqësisë dhe Zhvillimit Rural, Bledi Çuçi mendon se përgjimet e publikuara nga gazeta gjermane Bild, janë biseda normale që ndodhin rëndom dhe në gjithë botën.
Në një intervistë televizive, Çuçi tha se nuk ka asgjë të jashtëzakonshme, fabula dihej dhe se çdo politikan në të gjithë botën komunikon me të gjithë në fushatë elektorale.
“Janë biseda që rëndom në periudha fushatash bëhen jo vetëm në Shqipëri por në gjithë botën. Nuk është se ka ndonjë…Ai ishte i lirë në momentin që janë bërë përgjimet. Ai ishte një njeri i lirë që nuk ishte i proceduar nga organet ligjzbatuese. Nuk e di a është ai që u arrestua dhe u la i lirë. Kjo është një ngjarje që ka ndodhur më vonë nga përgjimet. Duhet t’i vëmë edhe ngjarjet në kronologji. E ka arrestuar po kjo polici, po kjo qeveri por ta marrim si çështje që ka të bëjë me favorizime. Nga kjo pikëpamje nuk shoh asgjë të çuditshme. Dihej fabula sepse nga kjo dosje kanë dalë dhe përgjime të tjera. Publiku besoj e ka marrë, i ka dëgjuar dhe është bindur se aty nuk ka asgjë të jashtëzakonshme nga zakoni jo i zakonshëm i politikës shqiptare. Por prapë them se çdo politikan në gjithë botën komunikon me të gjithë. Edhe po të ishte i arrestuar prapë legjitimohet që politikani t’i kërkojë votën”, deklaroi Çuçi.
Ai theksoi se e sheh problemin tek prokuroria, tek mos-hetimi dhe dalja e sekretit hetimor. Kohë më parë, në një tjetër rast të rëndë ku u përdhunua një minorene, ministrja e Shtetit Elisa Spiropali do të deklaronte se këto ngjarje i ka parë dhe në filma.
Përgjimet vënë në dukje lidhjet direkte që Astrit Avdylaj, kreu i grupit, mbante me kryetarin e Bashkisë së Durrësit Vangjush Dako, por dhe me kandidatin aktual të Partisë socialiste për Bashkinë e Shijakut Elton Arban, si dhe angazhimin e Avdylajt për të siguruar vota për Partinë socialiste dhe një prej kandidatëve të saj, deputetin aktual Ilir Ndraxhi./ Opinion.al
