Numri dy i LSI ka reaguar nëpërmjet një deklarate për mediat në lidhje me përgjimet e publikuara nga gazeta ‘Bild’. Sipas Vasilit këto përgjime tregojnë që qeveria ka patur marrëdhënie me kriminelët. Kjo mjafton që qeveria të japë sa më shpejtë dorëheqjen. Në rast të kundërt ai ka paralajmëruar se populli ka të gjithë të drejtën legjitime të përdorë çdo mjet për të rimarrë pushtetin.
“Përgjimet treguan se si kriminelet kanë vjedhur votat. Se si qeveria është ngritur mbi votat e vjedhura. Sot shqiptaret panë qartë që ata që punojnë dhe nuk votojnë rilindjen e Edi Rames largohen nga puna dhe mbeten pa bukën e gojës. Shqiptaret e panë qartë se si pushteti dhe kriminelet puthen dhe dashurohen me njëri tjetrin, pasi janë produkte reciproke të njëri – tjetrit. Përfundimisht kemi një shtet i cili ka vdekur pasi rilindja ja ka shitur shtetin kriminelëve. Kryeministri Edi Rama dhe ministrat e tij që nga ky çast nuk mund të qëndrojnë më as 24 orë në zyrat e tyre. Qëndrimi i mëtejshëm qoftë edhe 1 orë më shumë është krim shtetëror, është puc shtetëror. Në rast se nuk largohen urgjentisht, është legjitime që populli nuk mundet e nuk do të pranojë të qeveriset nga kriminelët. Ndaj populli ka të drejtë të mbajë të gjithë qëndrimet që ai i shikon të arsyeshme, me të gjitha mjetet dhe instrumentat që i konsideron të arsyeshme për të vendosur pushtetin e tij në këtë vend. Ora e të vërtetës ka arritur prandaj kryeministri dhe ministrat duhet të lënë zyrat e tyre një orë e më parë” tha Petrit Vasili. /Opinion.al
