Pas arrestimit të bandës së shqiptarëve, autorë për të paktën 21 grabitje banesash në Itali, janë publikuar prapaskenat e hetimeve dhe dialogët e përgjimeve mes tyre.
Autoritetet italiane arritën të identifikonin automjetin me të cilin lëviznin dhe pas ndjekjes arritën në bazën e tyre në qendër të qytetit të Trentos.
Gjatë hetimeve janë marrë dhe pamjet e telekamerave që lejuan policinë të kuptonin lëvizjet e bandës.
Shtetasja shqiptare e arrestuar, Ndreka, i kërkonte anëtarit tjetër të bandës Danaj, që t’i gjente shumën e duhur prej 2 mijë eurosh për të paguar apartamentin e ri në zonat e San Kolombano, Rimini, apo Forli, ku grupi dëshironte të vendosej për të vazhduar garbitjet.
Lidhjet e grupit vërtetohen nga bisedat telefonike në Shqipëri ku Danaj thoshte se kishte një punë për të bërë dhe i duhej dikush me patentë shoferi.
Sipas hetuesve italianë, banda merrte informacione të vlefshme për grabitjet nga banda të tjera shqiptarësh. Disa nga pronarët e shtëpive të grabitura kanë identifikuar në polici shqiptarët, ndërsa tashmë pritet dalja e tyre në gjyq. /Tv Klan/
