Në fundin e fazës së parë të kampionatit spanjoll edhe arbitrat kanë bërë një bilanc të ecurisë, sidomos të VAR-it. Është viti i parë dhe shefi i arbitrimit në federatën spanjolle, Velasko Karbajo ka vlerësuar përdorimin e teknologjisë. Gjatë mbledhjes janë publikuar dy raste ku zbulohen hapur bisedat mes arbitrit kryesor dhe atij të VAR-it. Bëhet fjalë për sfidën Real-Sociedad dhe Barcelona-Real Madrid.
Biseda
Arbitri kryesor i ndeshjes Munuera Montero e përjeton shumë rastin dhe e shoqëron që nga momenti fillestar deri në fund me të bërtitura. “A ishte pozicion i rregullt? Topin, topin…”, u thotë asistentëve të tij dhe sallës së VAR-it në momentin që portieri Ruli pengon sulmuesin Vinicius.
Por, i menjëhershëm ka qenë reagimi nga salla e VAR-it, ku përgjegjësi Melero Lopez u kërkon ndihmësve të tij që ta rishikojnë rastin. “Dua ta shoh. Përsëriteni edhe një herë. Dua një pamje tjetër. Tjetër, tjetër, nga këtu nuk kuptoj asgjë”, thotë arbitri që qëndronte në dhomën e VAR-it dhe sheh në përsëritje rastin ku sulmuesi brazilian pengohet nga portieri i Real Sociedadit.
Pastaj vjen komunikimi për Munueran në fushën e lojës. “Asgjë. Lërë të luhet. Asgjë, asgjë. Vazhdojmë përpara. Gjithçka në rregull Hoze Luis (Munuera). Vazhdojmë lojën”, ishte fjalia e fundit që mbylli këtë çështje dhe loja vazhdoi sikur të mos kishte ndodhur gjë, pavarësisht pretendimeve të lojtarëve të Realit dhe tifozëve në fushën e lojës.
Shefi i arbitrave në federatën spanjolle të futbollit, Velasko Karbajo foli për këtë rast dhe shpjegoi gjithçka. “Nuk e publikuam këtë rast për të konfirmuar se të gjitha rastet e dyshimta rishikohen apo për të shpjeguar konfuzionin që ndodh. VAR-i fillon t’i shikojë vetë rastet në mënyrë të menjëhershme pasi kanë ndodhur.
Nëse arbitrat përgjegjës në dhomën e VAR-it shohin një gabim, ata ndërhyjnë menjëherë, pa pritur që topi të dalë jashtë fushës së lojës. Në këtë rast, VAR-i nuk pa ndonjë gabim të Munueras dhe vendosi që nuk ishte penallti”, tha Karbajo.
El Clasico
Në mbledhje janë transmetuar edhe pamjet dhe komunikimi mes arbitrit dhe VAR-it në ndeshjen mes Barcelonës dhe Realit të Madridit ku u akordua penallti për Suarezin. Kjo është biseda.
Asistenti: Korrekte, korrekte!
Sançez Martinez (Arbitri kryesor): Topin, topin, topin. Për mua ka prekur topin.
VAR (Hernandez Hernandez): Mos e rifillo lojën ë…
Loja vazhdon me aksionin e Barcelonës dhe ndërhyn asistenti.
Asistenti: Pozicion jashtë loje. Pozicion jashtë loje.
VAR: Mos e rinis lojën tani të lutem. Mos e nis.
Asistenti: Hoze, Hoze, Hoze, Hoze.
VAR: Hoze Maria, Hoze Maria.
Arbitri për lojtarët: Prisni se po e shikojnë rastin.
VAR: Më dëgjo një moment Hoze Maria (bëhet fjalë për arbitrin Sançez Martinez)
Arbitri kryesor: Më thuaj, më thuaj.
VAR: Më the që për ty ka prekur topin. E vërtetë?
Arbitri: Po.
VAR: Mos e nis lojën! Më dëgjon? Mos e nis lojën të lutem!
Arbitri: Në rregull. Në rregull, kuptova.
Arbitri për lojtarët: Largohuni nga këtu! Qetësohu, qetësohu, qetësohu!
Ndërhyn Serxho Ramos: Nuk the asgjë për penalltinë e Suarezit më parë…
Arbitri: Qetësohu, qetësohu! Serxho, qetësohu! Nuk do të bëhet ajo që doni ju. Për këtë gjë punojmë ne të tjerët. Në rregull! Eja këtu dhe qetësohu!
VAR: Hoze Maria, të lutem!
Arbitri: Prisni, prisni!
VAR: Hoze Maria, të lutem! Të këshilloj që të shkosh ta shikosh.
Arbitri: Në rregull, perfekt. (Niset drejt monitorit)
VAR: Nuk e prek topin, Varan godet nga pas Luis Suarezin.
Arbitri: Në rregull. Më jep ta shoh rastin.
VAR: Po, e ke gati. E sheh?
Arbitri: Po, e shoh. Ja dhe kontakti. Për mua është në rregull. Po. Penallti. Ja ta shoh këtu, ja ta shoh. Po. Penallti, por pa karton.
VAR: Perfekte. E drejtë Hoze Maria.
Arbitri: Pa karton
