Nënkryetari i LSI-së, Petrit Vasili, ka hedhur akuza të forta ndaj Prokurorisë për moshapjen e hetimeve ndaj deputetëve socialistë të kapur në përgjime duke biseduar me ish-drejtorin e burgjeve , Arben Çuko, për të punësuar në këto institucione militantë të Partisë Socialiste.
Vasili tha se prokuroria duhet të kishte nisur një hetim penal për personat e përfshirë në përgjime.
“Po të ishte një Prokuroi korrekte sot duhet të kishte filluar hetimi penal edhe për deputetët, edhe për drejtoreshën e kabinetit edhe për të tërë me radhë”, tha Vasili nga selia e LSI-së.
“Po ky është ai votimi me 69 vota që ndodhi për Prokuroren e Përgjithshme në mënyrë që të mbyllin sytë përpara këtij turpi, i cili ka prekur çdo shqiptar dhe çdo të ri shqiptar, të cilit i vritet ëndrra sepse ndërkohë që dëgjon punësimet e ekselencës merr vesh sesi janë listat e partisë dhe sesi duhet të rekrutohesh nga partia që të kesh mundësi të marrësh bukën e gojës”, shtoi më tej kryetari i deputetëve të LSI-së.
