Ashtu siç ndodh zakonisht në proçeset zgjedhore në Shqipëri, edhe këtë radhë forcat politike në përballje kanë nxituar të flasin për fitore respektive, ende pa nisur procesi i numërimit.
Fillimisht ishte deputetja socialiste Blerina Gjylameti, që në një komunikim për mediat ka pohuar se fitorja e kandidatit socialist është brenda kutive dhe këtë do ta dëshmojë numërimi.
“Dibranët e kanë bërë sot zgjedhjen e duhur. Na mbetet të lexojmë votat. Ajo që kërkojmë ka të bëjë me faktin që subjekte politike duhet të pranojnë rezultatin e këtyre zgjedhjeve. Fitorja e kandidatit tonë është brenda kutive dhe këtë do ta dëshojmë në fund të numërimit”, është shprehur Blerina Gjylameti.
Ndërkohë edhe zëdhënësja e shtabit elektoral demokrat në Dibër Irini Shehu, pak minuta më parë është shprehur se nga informacionet e PD-së kandidati i të djathtës Sherefedin Shehu ka fituar bindshëm.
“Procesi i votimit është përmbyllur. Tani që procesi ka përfunduar, me rëndësi është mirëmbajtja e transportit të kutive. Sipas informacioneve paraprake, Sherefedin Shehu është kryebashkiaku i ri i Dibrës. Prisni dhe pak do ta tregojë rezultati”, është shprehur Irini Shehu.
Procesi i votimit për zgjedhjet në Dibër ka përfunduar dhe tashmë pritet të nisë numërimi në KZAZ-në nr 19. Sipas parashikimeve, deri pasditen e nesërme, dibranët do të kenë mësuar emrin e kryetarit të ri te bashkise. Mësohet se në këtë proces morën pjesë 53% e votuesve.
