Ka përfunduar takimi në kryesinë e Kuvendit mes Edi Ramës dhe Ilir Metës. Ky takim zgjati rreth 45 minuta dhe mori gjithë vemendjen mediatike, pasi ka qenë javë e tensionuar ajo që lamë pas mes dy partive të koalicionit. Ende nuk dihet se çfarë është diskutuar, por pas tij në zyrën e Metës janë parë të hyjnë dy ministra të LSI, përkatësisht Sokol Dervishi dhe Klajda Gjosha.
Tensionet mes partive të koalicionit janë rritur pas deklaratave të ministrit të Drejtësisë Ylli Manjani, dhe ministrit të Brendshëm Saimir Tahiri lidhur me kanabisin. Gjatë fundjavës ishte Lefter Koka ai që përforcoi akuzat duke deklaruar se “policia e Durrësit po bën ‘lojë të fortësh’ me LSI”. Menjëherë ka reaguar vetë kryeministri Edi Rama në një postim në Facebook, ku shprehej se raporti i KE nxirrte policinë e shtetit si institucionin më të besuar të shqiptarëve.
Nuk kanë munguar më pas deklaratat mes deputetëve të të dy partive, siç ishin Vangjel Tavo apo Vladimir Kosta. Një ditë më parë, kreu i LSI Ilir Meta mësohet të ketë thënë se nuk duhen retorika por zgjidhje.
