Ish-kryeministri, Sali Berisha, ka dhënë një deklaratë për mediat, pas takimit të zhvilluar me shefen e misionit të vëzhguesve të ODIHR-it, Audrey Glover.
Berisha bëri me dije se takimi ishte i karakterit formal, ndërsa shtoi se me Glover diskutoi gjerësisht mbi procesin zgjedhor, dhunimin në vlerësimin e PD të ligjit ndërkombëtar dhe konventave ndërkombëtare për zgjedhjet e lira.
“Ishte një takim në të cilin diskutuam gjerësisht mbi procesin zgjedhor, dhunimin në vlerësimin tonë një nga një të ligjit elektoral dhe konventave ndërkombëtare për zgjedhjet e lira. Informova gjithashtu zonjën për ‘puçin’ anti-kushtetues ndaj opozitës shqiptare, bashkëpunimin e korrupsionit shqiptar ndërkombëtar për të lënë vendin pa opozitë dhe vendosmërinë e PD për të çuar para procesin electoral. Mendoj se zonja Glover ishte tek ne në një takim për t’u informuar mbi pikëpamjet, faktet dhe zhvillimet sipas PD të këtyre zgjedhjeve në Shqipëri. Them se ne paraqitëm të gjithë problematikën për një proces normal zgjedhjesh”, deklaroi Berisha.
Takimi nisi që prej orës 13:00. Më herët gjatë ditës së sotme Audrey Glover takoi edhe kreun e Partisë së Lirisë, Ilir Meta.
