Ka përfunduar pas katër orësh takimi mes kryeministrit Edi Rama dhe përfaqësuesve socialistë të cilët do të organizojnë fushatën zgjedhore të 30 qershorit.
Takimi i cili nisi në orën 19:00, u zhvillua në ambientet e vilës 31 në ish-bllok, ku ishin të pranishëm deputetë, ministra dhe ish-ministra të kabinetit “Rama”.
Mësohet se në këtë takim u diskutua për organizimin e fushatës zgjedhore dhe marrëdhënia e PS me opozitën.
Deri më tani, Kryeministri Edi Rama i ka dërguar gjashtë letra publike kundërshtarit të tij politik Lulzim Basha, duke i thënë se kjo është java e fundit ku mund të ketë mundësi për dialog mes palëve.
Rama i kujton Bashës se po bën të njëjtat veprime si dy vjet më parë, ndërsa e akuzon se po vepron për të penguar hapjen e negociatave për anëtarësim me Bashkimin Europian.
Nga ana tjetër opozita ka refuzuar ftesën për dialog, duke kërkuar largimin e Edi Ramës, shtyrjen e zgjedhjeve lokale si dhe krijimin e një qeverie tranzitore./ Opinion.al
