Kreu i Partisë Demokratike, Lulzim Basha, të shtunën, përfundoi takimin me strukturat e kësaj partie në qytetin e Lezhës.
Mësohet se Basha është shprehur para drejtuesve lokalë të PD-së, se shpreson në pafajsinë e kryebashkiakut Fran Frrokaj, si dhe ka shprehur vullnetin e forcës politike që drejton për hetim të paanshëm, jopolitik dhe profesional.
Mesazhi i Bashës është se PD kërkon zbatimin e standardit se të gjithë duhet të jenë të barabartë para ligjit.
Basha deklaroi se është e rëndeishme që të mos ketë drejtësi selektive, në funksion të një axhende politike të caktuar.
Ndërkaq, në kohën kur kreu i PD-së po zhvillonte mbledhje me strukturat e partisë në Lezhë; dhjetra qytetarë ishin grumbulluar para policisë lokale në mbështetje të kryebashkiakut Fran Frrokaj, i cili u arrestua një ditë më parë për ‘tjetërsim pronash’ tek zona e “Ranës së Hedhun” në Shëngjin.
Mësohet se ata kanë dalë në mbështetje të kryebashkiakut, pasi sipas tyre vendimi u duket i padrejtë dhe mendojnë se është për qëllime politike./Opinion.al
