Ambasadori i Bashkimit Europian në Tiranë, Silvio Gonzato, zhvilloi sot një takim me kryekomisionerin e zgjedhjeve, Ilirjan Celibashi, në ambientet e Komisionit Qendror të Zgjedhjeve. Pas takimit, Gonzato u shpreh për gazetarët se BE mbështet procesin zgjedhor në Shqipëri, por nuk ka asnjë rol ndërhyrës.
“Unë nuk bëj deklarata para zgjedhjeve,” tha ambasadori Gonzato, duke theksuar se Bashkimi Europian ka besim të plotë te misioni i ODIHR-it, i cili po monitoron nga afër zgjedhjet e 11 majit.
Ai rikujtoi se “lufta ndaj krimit të organizuar dhe korrupsionit është në zemër të negociatave për anëtarësim” dhe se Prokuroria e Posaçme (SPAK) ka një detyrë shumë të rëndësishme në këtë drejtim.
“BE është këtu për të mbështetur Shqipërinë në rrugën e saj drejt integrimit, jo për të ndërhyrë apo manipuluar ndonjë proces,” deklaroi Gonzato, duke kërkuar që vëmendja të fokusohet te garantimi i një procesi të drejtë, të lirë dhe transparent.
Gonzato u shpreh se do të vazhdojnë mbështetjen ndaj KQZ-së edhe pas zgjedhjeve.
“Shumë aktorë politikë e dinë metodologjinë e përdorur nga ODIHR. ODIHR është totalisht i pavarur dhe respektojmë pavarësinë e tyre dhe kjo është arsyeja pse mbështetshim rekomandimet e tyre. Kjo është arsyeja pse bashkëpunojmë dhe po shohim përpara për raportin final. Siç e thashë zgjedhjet janë të rëndësishme sepse janë të parat që zhvillohet pas hapjes së negociatave dhe grup-kapitujve me BE-në që kanë të bëjnë me institucionet demokratike dhe proceset demokratike.
U takova me Celibashin sepse doja të kisha një përditësim sesi po shkon puna dhe për të parë sesi të vazhdojmë mbështetjen nga KQZ. Kemi besim te KQZ dhe pas zgjedhjeve do të vazhdojmë edhe me financimin e KQZ-së për të përmirësuar mënyrën e të bërit punën”, tha Gonzato.
