Ligji i Vetingut është konform Kushtetutës. Kështu deklaroi sot Gjykata Kushtetuese e cila vendosi të zbatohet ligji i shumëdebatuar. Kësisoj merr fund edhe saga e gjatë e këtij ligji dhe debatet e shumta politike rreth tij. Tashmë pritet për tu parë se çfarë do të ndodhë në realitet me gjyqtarët dhe prokurorët që janë objekt i këtij ligji.
Me vendimin e sot Kushtetuesja rrëzoi pretendimin e PD-së, duke i hapur rrugën zbatimit në praktikë të ligjit kyç të paketës së reformës në drejtësi.
Vendimi i tetë anëtarëve të Gjykatës Kushtetuese u shpall pas një mbledhjeje që zgjati tre orë, vetëm pak ditë pas mbërritjes në Tiranë të opinionit të Komisionit të Venecias që e certifikoi ligjin si të përputhshëm me Kushtetutën.
Gjykata përmes një njoftimi për mediat deklaroi se: “pasi shqyrtoi dhe analizoi pretendimet e paraqitura nga kërkuesi si dhe parashtrimet e subjekteve të interesuara, vendosi rrëzimin e kërkesës”.
Ligji për “rivlerësimin kalimtar të gjyqtarëve dhe prokurorëve në Republikën e Shqipërisë”, i njohur gjerësisht si ligji i vetingut u pezullua përkohësisht nga Gjykata Kushtetuese pas ankesës së dorëzuar atje nga Partia Demokratike. Në kërkesën e saj, PD e cilësonte ligjin si antikushtetues, ndërsa kontestimi kryesor lidhej me rolin që institucionet në varësi të ekzekutivit do të kenë në kontrollin e gjyqtarëve dhe prokurorëve.
Duke njohur konfliktin e interesit me këtë ligj, Gjykata Kushtetuese iu drejtua për mendim Komisionit të Venecias. Më 10 dhjetor, ky Komision vlerësoi se ligji është në përputhje me standardet europiane dhe se institucionet e reja që do të kryejnë vetingun, sipas saj kanë mundësinë të kontrollojnë informacionet që vijnë nga institucionet në varësi të ekzekutivit.
Zbatimi i ligjit të vetingut është kushti kyç që Bashkimi Europian i ka vendosur Shqipërisë për hapjen e negociatave. Vendimi i Gjykatës Kushtetuese i hap dritën jeshile ngritjes së institucioneve që do të kalojnë në sitë gjyqtarët dhe prokurorët si dhe nisjen e procesit që pritet të pastrojë sistemin e drejtësisë nga personat e dyshuar për korrupsion dhe lidhje me krimin e organizuar.
