Teksa mbrëmjen e djeshme u mbyll numërimi në të gjithë qarqet sa i përket votave për subjektet politike, tashmë vijon procesi për numërimin e votave preferenciale.
Në tre qarqe bëhet e ditur se edhe numërimi i votave për kandidatët ka përfunduar, por kujtojmë se mbeten për tu numëruar edhe votat për kandidatët nga diaspora.
Kukësi, Vlora dhe Berati e kanë mbyllur këtë proces, teksa edhe Gjirokastra është drejt përfundimit teksa kanë mbetur shumë pak qendra votimi për të numëruar.
Deputetët që shkojnë në Parlament sipas numërimit të votave nga brenda vendit në këto qarqe janë:
Në qarkun e Vlorës për Partinë Socialiste përveç Bledi Çuçi, Zamira Sinaj, Erjona Ismaili dhe Pirro Vengu që janë në listë të mbyllur, pritet të jenë edhe Damian Gjiknuri, Vullnet Sinaj, Ardit Bido, Vasil Llajo dhe Brunilda Mersini.
Në qarkun e Beratit përveç Ervin Demo dhe Enriketa Jaho që janë në listë të mbyllur, pritet të marrin mandate edhe Hysen Buzali, Fadil Nasufi dhe Julian Zyla.
Në qarkun Gjirokastër përveç Mirela Kumbaros që është në listë të mbyllur, shtohen edhe dy deputetë të tjerë duke qenë se PS ka 3 mandate në këtë qark.
Kandidatët me më shumë vota nga numërimet deri tani janë Tërmet Peçi, Piro Dhima, por do të shohim edhe pjesën e kuotës gjinore duke qenë se në vend të tretë kemi një grua, Anila Dhimitri.
Në qarkun Kukës nga Partia Socialiste është Eduard Shalsi në listë të sigurtë dhe nga lista e hapur nuk merr kandidatë duke qenë se ka vetëm 1 mandat në këtë qark.
Ndërkohë sa i takon Partisë Demokratike në këtë qark është Flamur Hoxha që është në listë të sigurtë dhe Shkëlqim Shehu nga lista e hapur që ka fituar më shumë vota preferenciale, nga votat brenda vendit./tvklan
