Operacioni i kërkim-shpëtimit në Thumanë ka përfunduar. Pas nxjerrjes së 3 viktimave mbrëmjen e djeshme nga rrënojat e një prej pallateve të shembura nga tërmeti nuk ka më informacioni për njerëz të zhdukur në zonë.
Shefi i repartit të zjarrfikës të Kamzës, Arben Cara ka njoftuar nëpërmjet një statusi në Facebook përfundimin e këtij operacioni. Ai ka qenë pjesë e tij që nga fillimi dhe ka asistuar në nxjerrjen e trupave të pajetë të disa kushurinjëve të tij.
“Merr fund ankthi për gjetjen e viktimave në Thumanë, u prehshi në paqe vëllezër, motra të familjes së madhe Cara, dhimbja nuk njeh kufi për këta njerëz të pafajshëm, ngushëllime për të gjithë ata që humbën familjarët e tyre në këtë katastrofë natyrore! Faleminderit kolegëve tanë të Kosovës, Greqisë, Italisë dhe mbarë Shqipërisë për ndihmën e madhe që na dhanë në këtë situatë të jashtëzakonshme! Punuan natë e ditë deri në gjetjen e trupit të fundit pa u lodhur, duke mos hezituar të rrezikonin edhe jetët e tyre! Faleminderit, faleminderit, faleminderit”, shkruan Cara.
Tërmeti tragjik i 26 nëntorit ka shkaktuar 23 viktima në Thumanë nga të cilët 5 kanë qenë të familjes Cara.
Ndërkohë në Durrës vazhdohet ende të punohet për nxjerrjen e trupave të tjerë që mendohet se janë nën rrënoja. /Opinion.al
