Pesë ditë nga zgjedhjet e 11 Majit, ka përfunduar në gjithë vendin procesi i numërimit edhe i votave prefenciale apo siç njihet ndryshe i votave për kandidatët e listës së hapur.
Komisioni Qendror i Zgjedhjeve njoftoi se në total Komisionet Zonale të Administrimit Zgjedhor numëruan dhe vlerësuan fletët e votimit për 5225 qendrat e votimit, nga të cilat 12 janë konsideruar si të parregullta.
Në total në rang vendi Partia Socialiste ka marrë nga lista e hapur 37 deputetë, ndërsa Partia Demokratike vetëm 6.
Më konkretisht sipas qarqeve, PS nga Berati do të çojë në Kuvendin e ri 3 deputetë nga lista e hapur, ndërsa demokratët asnjë. Në Qarkun e Dibrës, ish-kryebashkiaku socialist i Burrelit, Agron Malaj do të jetë i vetmi që do të shkojë në Kuvend nga lista e hapur, si përfaqësues i Partisë Socialiste.
Ndërkohë në qarkun e Durrës PS do të dërgojë në Kuvend nga lista preferenciale 3 deputetë, ndërsa Partia Demokratike vetëm një.
Elbasani është një tjetër qark ku PS ka shënuar një fitore shumë të thellë duke dhe do të ccojë në Kuvend 5 deputetë nga lista e hapur. Partia Demokratike, jo vetëm që nuk ka mundur të nxjerrë asnjë deputetë nga lista e hapur, por nuk ka mundur të plotësojë as listën e mbyllur.
Fieri është një tjetër qark ku Partia Socialiste siguroi një fitore të thellë duke nxjerrë plotë 7 deputetë nga lista e hapur, ndërsa PD ashtu si edhe në Elbasan, nuk plotëson dot listën e mbyllur.
Në Gjirokastër PS ka nxjerrë dy deputetë nga lista e hapur dhe PD asnjë.
Ndërsa në Korçë PS ka mundur të sigurojë 3 mandate nga vota preferenciale, ndërsa PD 1.
Ndërkohë Kukësi është 1 nga 2 qarqet ku Partia Socialiste nuk ka mundur të marrë asnjë deputetë nga lista e hapur, ndërsa PD ka mundur të sigurojë 1.
Qarku i dytë ku PS nuk ka mundur të nxjerrë asnjë deputetë nga lista e hapur është Shkodra. Në zonën zgjedhore më të madhe të veriut vetëm PD do të ccojë në Kuvend 1 deputetë nga lista e hapur dhe ai është ish-kryebashkiku Bardh Spahia.
Gjithashtu Lezha është një tjetër qark ku PD është në avantazh edhe sa i përket deputetëve nga lista e hapur në raport me PS. Kjo pasi demokratët kanë siguruar 2 mandate, ndërsa socialistët vetëm 1.
Tirana, qarku më i madh në vend i ka dhënë socialistëve plotë 7 mandate të zgjehdur nga vota preferenciale. Listën e kryeson Blendi Gonxhja, i cili është edhe më i votuari në radhët e PS me 21809 vota.
Ndërkohë deputetët kanë nxjerrë nga lista e hapur në këtë qark vetëm Jordia Tabakun, e cila gjithashtu rezulton të jetë kandidatja më e votuar në radhët e PD-së në gjithë vendin, me plotë 18850 vota.
Vlora është një tjetër qark ku Partia Demokratike nuk ka mundur të nxjerrë deputetë të gjithë kandidatët e listës së mbyllur, ndërkohë që Partia Socialiste në këtë zonë ka siguruar plotë 5 mandate.
