Në tetë ndeshjet e së mërkurës në Champions League, për javën e pestë të aktivitetit, befasia më e madhe ishte humbja e Bajernit të Mynihut përballë rusëve të Rostovit.
Edhe pse janë të kualifikuar në grupin D, nga bavarezët nuk pritej një humbje e tillë, që për më tepër është e dyta në pak ditë, pas asaj ndaj Borusias së Dortmundit në Bundeligë.
Rostovi fitoi 3-2 ndaj një Bajerni jo me formacionin e plotë, jashtë së cilit ishin lënë fillimisht jashtë Hummels, Müller, Alonso e Kimmich.
Në takimin tjetër të këtij grupi, Atletiko e Madridit mposhti 2-0 PSV Eindhovenin, duke qenë skuadra e vetme me 15 pikë pas pesë takimesh. Atletiko, pavarësisht vështirësive që po has në kampionatin spanjoll, është paraqitur krejt ndryshe në Champions League, duke i fituar të pesë ndeshjet, si asnjë ekip tjetër.
Grupi B mbetet një nga më të paparashikuarit, kur gjithçka është lënë për takimet e fundit.
Beshiktashi qe në humbje 0-3 ndaj Benfikës që në minutën e 31-të të lojës në “Vodafone Arena” të Stambollit, por gjeti forca të barazojë në pjesën e dytë. Rezultati 3-3 e lë të hapur kualifikimin si për turqit dhe për portugezët.
Zhgënjyese paraqitja e Napolit, që barazoi 0-0 me Dinamon e Kievit. Napolitanët nuk shfrytëzuan faktorin fushë, dhe tani janë ekipi më i rrezikuar për t’u eliminuar, pasi më 6 dhjetor luajnë në Lisbonë.
Arsenali dhe PSG-ja barazuan 2-2, dhe po në nivel të barabartë janë dhe në renditjen e grupit A. Të kualifikuar, anglezët dhe francezët kryesojnë me nga 11 pikë.
Në takimin Ludogorec – Bazel u regjistrua barazimi i dytë pa gola i mbrëmjes pas atij të Napolit.
Në grupin C, sfida mes Borusias së Mynshegladbahut dhe Mançester Sitit qe mjaft e luftuar, aq sa pati dhe dy kartona të kuq, nga një për secilën skuadër. E mbyllur në barazim 1-1, golat u shënuan që të dy në pjesën e parë. Mançester Siti siguroi kështu kalimin në fazën tjetër të veprimtarisë.
E kualifikuar, Barcelona luajti e patensionuar në Skoci ndaj Sëlltikut, duke fituar 0-2, me dy gola të Lionel Messi-t.
