Ditën e sotme do të lirohet nga burgu një nga krerët më të rrezikshëm të bandave që u krijuan në vitin 1997. Nehat Kulla, i njohur ndryshe si ‘gjenerali’ ka përfunduar dënimin me 20 vjet burg për vrasjen e Halim Gjuzit, ish-shoferit të ish-zv/ministrit të Arsimit, Halit Shamata më 1998. Për këtë ngjarje ai është dënuar në vitin 2005 nga Gjykata e Tiranës.
Nehat Kulla ishte një nga eksponentët kriminal që dolën në trazirat e vitit 97’ në Tiranë. Ai mori nofkën gjenerali pasi kishte grabitur një kamionçinë ushtarake me targa ushtrie, sinjale policie dhe mbante veshur uniformë ushtarake.
Ai është arrestuar gjatë periudhës së komunizmit për me thikë dhe u dënuar nga Gjykata e Tiranës. Më pas në Dhjetor 1996 u dënua me 11 vjet burg për vrasjen e Petrit Moriçenit dhe vëllezërve Neziri, njëri prej të cilëve me detyrë polic pranë komisariatit 4 në Tiranë. Ngjarjet e vitit 1997 ndihmuan në arratisjen e tij nga burgu, por vetëm për një periudhë 2 vjeçare pasi u arrestua më 12 shtator 1999 në aksin Peqin-Elbasan.
Gjykata e Apelit e zbuti dënimin ndaj Kullës nga 12 vjet burg në 2 vjet e gjysmë. Megjithatë ai u lirua për sjellje të mirë 30 ditë përpara se të përfundonte vendimi i Apelit. Vetëm pak muaj pas lirimit në vitin 2001, ai rikthehet në qeli nën akuzën e rrahjes së një grupi gazetarësh të revistës Klan dhe dënohet me 5 vjet burg, por lirohet sërish për sjellje të mirë. Në vitin 2005, pas ardhjes në pushtet të Partisë Demokratike, ai riarrestohet dhe dënohet me 20 vjet burg për vrasjen e Halim Gjuzit në vitin 1998 në Golem, shoferi i ish-Ministrit të Brendshëm Halit Shamata. /Opinion.al
