Në seancën që po zhvillohet në Gjykatën Kushtetuese për shqyrtimin e kërkesës së Kuvendit për shkarkimin e Presidentit, Ilir Meta, i pyetur nëse Presidenti e ka respektuar rolin e tij për të qenë mbi palët, këshilltari i Metës, Bledar Dervishaj tha se gjatë gjithë mandatit Presidenti e ka luajtur këtë rol.
Lidhur me përfshirjen e Presidentit në zgjedhje ai u shpreh se presidenti ka komunikuar me letër me Komisionerin Shtetëror, ku kërkonte që i gjithë kabineti i kreut të shtetit të merrte pjesë në vëzhgimin e zgjedhjeve. Ndërkohë sipas Dervishaj, Celibashi i bëri me dije presidentit që se bashku me kabinetin e tij mund të merrte pjesë në vëzhgimin e zgjedhjeve, kështu që ndërhyrja e presidentit në vëzhgimin e zgjedhjeve ishte legjitime.
Dervishaj gjithashtu bëri me dije se presidenca ka realizuar një platformë bashkëpunimi që ua ofroi palëve për të kapërcyer krizat politike, por asnjë nuk mori përsipër ta ndiqte.
“Presidenti ka komunikuar me letër me Komisionerin Shtetëror, ku kërkonte që i gjithë kabineti i presidentit të marrë pjesë në vëzhgimin e zgjedhjeve. Celibashi i bëri me dije të presidentit që se bashku me kabinetin e tij mund të merrte pjesë në vëzhgimin e zgjedhjeve. Prandaj ndërhyrja e presidentit në vëzhgim ishte legjitime.
Në vitin 2019, Kryetari njofton formalisht presidentit ku ai ka të drejtën për t’u dëgjuar para komisionit të ligjit. Në vitin 2021, ky standard është shkulur dhe Kuvendi e ka pranuar vetë këtë fakt.
I njëjti komision, i njëjti kryetar, e njëjta relatore, por standarde të ndryshme. Presidenti ka luajtur rolin e tij, pasi vendi u fut në situatë të jashtëzakonshme si pasojë e Covidit. Presidenti për të ruajtur qetësinë dhe balancat politike, hartoi një platformë bashkëpunimi që ua ofroj palëve për të kapërcyer krizat politike.
Përveç presidentit, asnjë palë tjetër nuk mori përsipër që ta ndiqte si platformë. Ai ka ndjekur ligjet kushtetuese, ku presidenti ka si qëllim ruajtjen e balancave dhe të qetësisë politike”, shtoi Dervishaj.
