Një kamion është përfshirë nga flakët në aksin rrugor Lushnje-Rrogozhinë.
Sipas Klan News, drejtuesi i kamionit ka parë tymin që po dilte nga pjesa e përparme e kamionit dhe ka hapur krahun.
Flakët janë përhapur me shpejtësi duke përfshirë të gjithë kamionin.
Flakët ishin të mëdha duke bërë që të krijohej panik te mjetet që kalonin në këtë aks si dhe prania e një karburanti rreth 50 metër afër.
Raportohet se në vendngjarje kanë mbërritur zjarrfikësit e Lushnjes, Divjakës, dhe Rrogozhinës të cilët bënë të mundur vënien nën kontroll të flakëve.
Grupi hetimor paraprakisht dyshon se shkak i flakëve është bërë një avari në linjën elektrike të kamionit.
