Përfaqësuesi i koalicionit opozitar “Bashkë Fitojmë”, Altin Kaziaj në një deklaratë për mediat ka denoncuar se persona me xhupa e kapuçë po ushtrojnë presion mbi të drejtën kushtetuese të qytetarëve për të votuar.
Ai i bëri thirrje kreut të Policisë së Shtetit, Muhamed Rrumbullaku, që të marrë masa duke shtuar efektivët për të nxjerrë jashtë qendrave të votimit këta persona që nuk kanë lidhje me komisionerët e qendrave të votimit.
“Personat që kanë detyra zgjedhore duhet të rrinë në këto ambiente. Shumë media kanë transmetuar persona me xhupa e kapuçë që po ushtrojnë presion mbi të drejtën kushtetuese të qytetarëve. I bëj thirrje drejtorit të Policisë së Shtetit zoti Rrumbullaku që të marrë masa të menjëhershme duke siguruar prezencën në atë që ligji e lejon të policisë duke nxjerrë jashtë qendrave të votimit këta persona që nuk kanë lidhje fare me komisionerët e qendrave të votimit, të jenë jashtë perimetrit 150 metërsh. Në Tiranë ka një prezencë të shtuar të këtyre personave, ky është një komunikim që po u bëhet qytetarëve, mos kini frikë nga intimidimi që po ju bëhet, merrni në telefon Policinë e Shtetit dhe nëse nuk ju përgjigjen, ne do marrim çdo aksion ligjor për përgjegjësit”, tha Kaziu.
Ai theksoi po ashtu se të gjithë komisionerët për koalicionin “Bashkë Fitojmë” janë në krye të detyrës.
