Kompania Apple ka njoftuar se një e metë po lejon hakerët që të marrin kontrollin e iPhone-ve, iPad-ëve dhe kompjuterëve Mac, ndërsa u bëri thirrje përdoruesve që të instalojnë një përditësim emergjent të softuerit.
Ky përditësim u lëshua në mesin e javës nga gjiganti i teknologjisë, me qëllim që të rregullohej një dobësi që hakerët po e shfrytëzonin.
Kompania amerikane tha se “Apple është në dijeni për këtë problem që mund të jetë shfrytëzuar në mënyrë aktive”.
Ndërkohë, mediat e huaja shkruajnë se,Apple nuk tregoi nëse kishte informacion lidhur me shkallën e kësaj ndërhyrjeje nga hakerët.
E meta e gjetur nënkuptonte se hakerët kishin mundësi të merrnin kontrollin e pajisjeve, duke pasur qasje në çdo të dhënë apo aftësi të pajisjeve.
Përditësimi është lëshuar për iPhone-ët, iPad-ët dhe kompjuterët Mac që kanë sisteme operative të ndjeshme./Opinion.al
