Po jepte një porosi nxënësve në emër të drejtorisë së shkollës për të marrë pjesë pasdite në mitingun e Edi Ramës në Kavajë por e larguan nga puna. Shkak u bë një video që nxënësit i bënë mësueses dhe më pas u shpërnda në media nga PD-ja për të denoncuar përdorimin e mësuesve dhe shkollave në fushatën e socialistëve.
Dhe qeveria e mori masën. Shkarkoi mësuesen nga puna….
Ministrja Lindita Nikolla deklaroi se “mësuesja Elona Bizhdili, e gjimnazit “leksander Moisiu” ka shkelur urdhërin tim të prerë për të mos bërë propagandë politike në klasë! Në zbatim të urdhërit, mësuesja do të largohet menjeherë, që sot, nga sistemi arsimor”.
Sakaq reagoi edhe Kryeministri nga salla e Parlamentit: “Mësuesit dhe nxënësit janë të lirë të aktivizohen politikisht, por jashtë mureve të shkollës”, tha ai.
Dhe për ti marrë hakun PD-së, vazhdoi: “Edhe na na kanë sjell foto të mësuesve e nxënësve në çadër, por asnjë gjemb në këmbë nuk u ka hyrë”.
Pyetja që shtrohet është: A është i drejtë shkarkimi i mësueses së Kavajës që përçonte një porosi të drejtorisë së shkollës? Dhe kjo e fundit një porosi të drejtorisë Arsimore? Dhe më tutje kjo e fundit porosinë e Partisë?!
Video: Dëgjojeni mësuesen kur thotë e gjithë shkolla është e organizuar për të shkuar në mitingun e kryeministrit.
