Në 6 janar emisioni “Stop” në Tv Klan transmetoi një denoncim të mbërritur në redaksi për një skemë të mirëfilltë mashtrimi në rrjetin social TikTok me thirrjen për mbledhje fondesh për një ndërhyrje shëndetësore për një fëmijë. Nik Kola ishte ‘live’ në TikTok me nënën e fëmijës, Xhevahire Laçi duke kërkuar para në llogarinë gofund për Erjon Laçin.
“Stop” solli një dëshmi ku një shtetas pretendon që Nik Kola i ka kërkuar t’i gjejë një të sëmurë për të hapur një llogari GoFund për t’i ndarë paratë përgjysmë.
“Stop” komunikoi me zonjën Xhevahire Laçi e cila fillimisht kërkoi të fliste më vonë e më pas bllokoi numrin. Pas saj, u kontaktua Nik Kola i cili tha se llogaria në GoFund ishte anuluar. Në fakt, u verifikua se llogaria ishte e hapur. Pas transmetimit, llogaria u mbyll dhe prokuroria dhe Drejtoria e Krimit Kibernetik nisën procedimin penal për mashtrim për protagonistët e vjedhjes përmes rrjeteve sociale.
